नेपाली कांग्रेसका महामन्त्री गगन थापाले केन्द्रीय कार्यसमिति बैठकमा सभापति शेरबहादुर देउवाकै अगाडि देउवालाई संसदीय दलको नेताबाट हटाउन फेरि प्रयास गर्ने बताएका छन् । बैठकमा पार्टी केन्द्रीय सदस्य सदस्यहरुले उठाएका प्रश्नको जवाफ दिँदै थापाले अहिले संसदीय दलको नेता फेर्नु आवश्यक रहेको र त्यसका लागि आफू लाग्ने बताए ।

‘संसदीय दलको नेता बदल्न लाग्छु, सके बदल्छु नसके मानेकै छु मान्छु । तर बदल्न लाग्छु ।’ थापाले भने– एकपटक प्रयास गरें, सकिनँ । अब नबदल्ने त ?  बदल्न आवश्यक छ ।’ विधानले नै नेता बदल्न ठाउँ दिएको भन्दै थापाले देउवा नआत्तिँदा पनि देउवा निकट नेता आत्तिएको भन्दै कटाक्ष गरे । थापाले नेता बदल्ने कुरा आफूले आफ्ना लागि नगरेको र जो कोही बने पनि हुने बताए । ‘ पाँच पटक भैसकें, अब म बन्दिनँ भनेर सभापतिजीले भन्न सक्नुहुन्छ, तर अरु साथीहरु आत्तिनुभएको छ ।’ थापाले भने, मैले मेरा लागी गरेको होईन, जो भएपनि हुन्छ ।

पार्टी बहुमत अल्पमतले मात्रै नचल्ने भन्दै थापाले  फरक मतले ठाउँ पाउनुपर्ने बताए । महामन्त्रीले कतिपय निर्णयहरु संचार माध्यमबाटै आएकोले आफूले पनि संचार माध्यमबाटै दिएको उनले बताए ।

पछिल्लो दिनमा नागरिकहरुलाई भेट्दा महशुस गरिएका विषयबाट आफू आत्तिएको उनले बताए ।  थापाले नागरिकमा निराशाको क्रम बढेको बताए । ‘पछिल्लो दिनहरु जे मैले महशुस गरेको छु, त्यसबाट म आत्तिएको छु । जो बाहिर जान पायो, उ खुसी छ । जो बाहिर जान पाएन, उ दुखी छ,’ थापाले बैठकमा भने, ‘गाउँको किसानदेखि शहरको सानोदेखि ठूलो उद्यम गरिहेको मान्छे कोही पनि खुसी देख्दिन । खुसी नभएको मात्रै होइन, निराश भएको देख्छु ।’