पाल्पाको लुम्बिनी मेडिकल कलेज एन्ड टिचिङ अस्पतालले विद्यार्थीहरुबाट सरकारले निर्धारण गरेको भन्दा बढी शुल्क असुलेको छ । कलेजले इन्टर्नसिप तथा अन्य अतिरिक्त शुल्क असुलेको तर फिर्ता नगरेपछि अतिरिक्त शुल्क फिर्ताको माग गर्दै विद्यार्थीहरु तीन दिनदेखि आन्दोलनमा उत्रिएका छन् ।

विद्यार्थीहरुले विभिन्न नारा लेखिएका प्लेकार्डसहित कलेज परिसरमा प्रदर्शन गरेका हुन् । लुम्बिनी मेडिकल कलेज दसौं ब्याच २०१७ डिसेम्बर एमबीबीएसका विद्यार्थीहरुले आफूहरुलाई कलेज प्रशासनले अनावश्यक अतिरिक्त शुल्क लिएको दाबी गरेका छन् । सय जनामध्ये ५६ जना विद्यार्थी अहिले इन्टर्नसिपमा जाने छन् ।

कलेजले इन्टर्नसिप शुल्क २ लाख, विश्वविद्यालय सम्बन्धन शुल्क ९५ हजार, शिक्षा सेवा शुल्क ४७ हजार ९ सय र अन्य अतिरिक्त शुल्क दसौं ब्याचका विद्यार्थीलाई मात्र लिएको दाबी छ । इन्टर्नसिप हुनु भन्दा अघि नै अतिरिक्त शुल्क फिर्ता गर्न पटक पटक निवेदन दिएको तर फिर्ता गर्न आलटाल गरेको एक विद्यार्थीले बताए ।
विद्यार्थीले पटकपटक निवदेन दिएपनि सुनुवाइ नभएपछि कलेज परिसरमा शान्तिपूर्ण आन्दोलनमा उत्रिन बाध्य भएको बताएका छन् । काठमाडौं विश्वविद्यालयले चैत–वैशाख मसान्तमा अन्तिम वर्ष लिएको परीक्षामा उतीर्ण विद्यार्थीहरुले असार ५ गतेबाट इन्टर्नसिप सुरु हुनुपर्ने थियो । विद्यार्थीले इन्टर्नसिप सुरु गर्न मानेका छैनन् ।

अतिरिक्त शुल्क र इन्टर्नसिपमा पाउनु पर्ने आधारभूत भत्ता यही समय अवधिभरमा पाउनु पर्ने हुन्छ । कलेजले उल्टै धम्क्याउने र जे गर्नुछ गर्नु भन्ने गैर जिम्मेवार जवाफ दिने गरेको आन्दोलित एक विद्यार्थीले आरोप लगाए ।

लुम्बिनी मेडिकल कलेज एन्ड टिचिङ हस्पिटलका कम्पनी सचिव कृष्णप्रसाद पराजुलीले पहिला लिन पाउने व्यवस्था अनुसार नै अतिरिक्त शुल्क लिएको बताए । तर अहिले चिकित्सा शिक्षा आयोगले गरेको निर्णय अनुसार त्यसपछिका विद्यार्थीलाई नलिएको उनले बताए । पराजुलीले एक वर्षको अवधिमा विद्यार्थीलाई नै निर्वाह भत्ता बापत दिइने बताए ।

तर विद्यार्थीमाथि इन्टर्नका नाममा शोषण गरेको विद्यार्थीको आरोप छ । १२ देखि १४ हजार रुपैयाँ विद्यार्थीलाई इन्टर्न अवधिभर दिने गरिन्छ । मुलुकभरका अधिकांश निजी मेडिकल कलेजमा पढ्दै आएका विद्यार्थी यस्तै समस्यामा रहेका छन् । निजी मेडिकल कलेजहरूले ४५ लाख भन्दा बढी लिन पाइँदैन तर विद्यार्थीले भने ६० लाख रुपैयाँ भन्दा बढी पढाइ शुल्क तिर्नुपर्ने बाध्यता रहेको गुनासो छ ।