सालझण्डी–ढोरपाटन सडक खण्ड अन्तर्गत पाल्पाको रैनादेवि छहरा गाउँपालिकामा बस दुर्घटना हुंदा ६ जनाको मृत्यु भएको छ । बिहीबार राति रैनादेवि छहरा गाउँपालिका वडा नं. ८ मधुवन टारीफाँट नजिकै राधादी गैरा जंगलमा भएको दुर्घटनामा परी सोही वडाको खुर्साने गाउंका ५४ वर्षिया खिमकुमारी राना, ३३ वर्षिया निर्मला घिमिरे, ११ वर्षिया सुरुमा घिमिरे, २१ व्र्षिया दानकुमारी खत्री, ४५ वर्षिया गुनी गाहा र १९ वर्षिया विमा पाण्डे रहेका रैनादेवि छहरा गाउँपालिका वडा नं. ८ का वडा अध्यक्ष रेमबहादुर रानाले जानकारी दिए । रुपन्देहीको सालझण्डीबाट यात्रु लिएर खुसार्ने जाँदै गरेको ग १ ख ४९७७ नम्बरको बस सडकबाट करिब ६० मिटर तल भिरमा खसेर दुर्घटना भएको प्रहरी चौकी जुठापौवाका बरिष्ठ हवल्दार लिलाबहादुर केसीले जानकारी दिए । दुर्घटनामा १६ जना घाइते भएका छन् । उनीहरुको लुम्बिनी प्रादेशिक अस्पताल बुटवलमा उपचार भइरहेको छ । दुर्घटनापछि बसका धनी र सहचालक फरार छन् । मृतकमध्ये तीन जनाको शव बसले च्यापेकाले शुक्रबार बिहान मात्र निकालेर पोर्टमार्टमका लागि लुम्बिनी प्रादेशिक अस्पताल पठाइएको केसीले बताए ।