विश्वकपका कारण नोभेम्बरमा रोकिएको इङ्लिस प्रिमियर लिगमा सोमबार ब्रेन्टफोर्ड र टोटनहमले २–२ गोलको बराबरी खेलेका छन्। ब्रेन्टफोर्डको मैदानमा भएको खेलको पहिलो हाफमा घरेलु टिमले १–० को अग्रता लिएको थियो।

भिटाली यानेन्टले गरेको गोलसँगै मध्यान्तर अगाडि १–० को अवस्थामा रहेको ब्रेन्टफोर्डले दोस्रो हाफको सुरुआतमा अग्रता दोब्बर पारेको थियो। इभान टोनेले ५४औं मिनेटमा क्रिस्टियन नोडगार्डको पासलाई गोलमा परिणत गर्दै अग्रता २–० मा पुर्याएका थिए।

त्यसको ११ मिनेटपछि ह्यारी केनले टोटनहमका लागि पहिलो गोल फर्काएका थिए। क्लेमेट लङ्गलेटको पासलाई केनले गोलमा परिणत गरेका थिए। लङ्लेटले पेनाल्टी एरिया अगाडिबाट दिएको क्रसलाई केनले ६ यार्ड बक्स अगाडिबाट हेडरमार्फत गोल गरेका थिए।

त्यसपछि ७१औं मिनेटमा पिएर एमिल होइबर्गले गरेको गोलसँगै टोटनहमले बराबरी गर्यो। डेजान कलुभ्सेभ्स्कीले दिएको पास ब्रेन्टफोर्डका खेलाडीलाई लागेर पेनाल्टी एरियामा रहेका होइबर्ग अगाडि आइपुगेको थियो। सोही मौकाको फाइदा उठाउँदै होइबर्गले टोटनहमलाई हारबाट जोगाए।

बराबरीसँगै १६ खेलबाट ३० अंक जोडेको टोटनहम चौथो स्थानमा छ। समान खेलबाट २० अंकसहित ब्रेन्टफोर्ड नवौं स्थानमा छ। लिग लिडर आर्सनलको १४ खेलबाट ३७ अंक छ।