काठमाडौं । मंसिर ४ को निर्वाचनपछि सरकार निर्माणका लागि कसरत शुरु भइरहेका बेला नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधव नेपालबीच आज (सोमबार) छुट्टै वार्ता भएको छ ।

अध्यक्ष नेपाललाई भेट्न प्रचण्ड उनको निवास कोटेश्वर पुगेका हुन् । त्यसपछि उनीहरु त्यहाँ वार्ता सकेपछि अलग–अलग प्रधानमन्त्रीको सरकारी निवास बालुवाटार निस्किएका छन् । मंसिर ४ को निर्वाचन अनपेक्षित नतिजा आएपछि माओवादी अहिलेकै गठबन्धन अघि बढाउने किन नयाँ विकल्पमा जानेबारे अझै अन्योलमै छ ।

शनिबार र आइतवार बसेको पार्टी पदाधिकारीको अनौपचारिक बैठकमा माओवादी नेताहरुबीच कांग्रेससहितको गठबन्धनमै रहने या विकल्पमा जाने भन्नेमा मतान्तर भएको थियो । बहुमत जुटाउन पनि मुस्किल पर्ने सिट आएको अवस्थामा सत्ता गठबन्धनबाट शेरबहादुर देउवा, प्रचण्ड र माधवकुमार नेपाल तीनै शीर्ष नेता प्रधानमन्त्रीको दौडमा देखिएका छन् ।
देउवाले पहिलो दल भएकाले आफूले सरकारको नेतृत्व गर्नुपर्न मत राखेका छन् । यस्तै माओवादी अध्यक्ष प्रचण्ड पनि सके यही गठबन्धबाट नभए अर्को गठबन्धन बनाएर भए पनि प्रधानमन्त्री हुने दाउमा छन् ।

मत खुम्चिन पुगेपछि प्रचण्ड र माधव नेपालबीच पार्टी एक बनाएर जाने दिशामा पनि छलफल जारी छ । तर माओवादीसँग मिल्ने कुरालाई लिएर समाजवादीमा ठूलो विवाद छ । कोटेश्वरमा भएको उक्त वार्तामा माओवादी नेता नारायणकाजी श्रेष्ठ पनि सहभागी थिए । त्यही वार्ताका क्रममा जनमत पार्टीका अध्यक्ष डा. सीके राउत पनि मिसिन पुगेको जनाइएको छ । राउत सत्ता गठबन्धनका लागि बहुमत पु¥याउने महत्वपूर्ण हिस्सा भएका छन् । सत्ता गठबन्धनले अहिले राउतसँगको सम्पर्कलाई बढाइरहेका छन् ।