१३ फागुन, काठमाडौं । साताको अन्तिम कारोबार दिन सेयर बजार परिसूचक नेप्से राताम्मे बनेको छ । बजारमा ४४.९४ अंकको गिरावट आउँदा कारोबार रकममा पनि संकुचन आएको छ ।

बिहीबार कुल २०६ कम्पनीको एक करोड ५८ लाख ५६ हजार १७१ कित्ता सेयर ८३ हजार ४०७ पटक खरिद बिक्री हुँदा कारोबार रकम ६ अर्ब ९ करोडमा झरेको छ जुन अघिल्लो दिनको तुलनामा झण्डै ६१ करोड रुपैयाँ भन्दा बढीले कम हो ।

बिहीबार दोस्रो बजारमा कारोबारमा आएका सबै उपसमूहका सूचक ओरालो लागेका छन् । बिहीबार नेपाल पूर्वाधार विकास बैंकको सेयरमा दोस्रो बजारमा सबैभन्दा धेरै कारोबार भयो ।

कम्पनीको ९० करोड ३५ लाख रुपैयाँभन्दा बढीको सेयर कारोबार भएको थियो भने दोस्रो धेरै कारोबार हुने कम्पनी नबिल बैंक भयो । सकारात्मक सर्किट लेबलमा कारोबार भएको चन्द्रागिरी हिल्सका लागिनीकर्ताले बजारमा सबैभन्दा धेरै कमाए भने दोस्रो धेरै कमाइ नेसनल हाइड्रोपावर कम्पनीको सेयर धनीले गरे ।

उतारचढावपूर्ण बजारमा चन्द्रागिरी हिल्सको शेयर ९.९१ प्रतिशतले बढ्यो भने नेश्नलको सेयर मूल्य ८.२२ प्रतिशतले बढ्यो ।

बिहीबार बैंकिङ उपसमूह ३७ अंक, जीवन बीमा उपसमूह २९९.७८ अंक र निर्जीवन बीमा उपसमूह १७६.१८ अंकले घट्यो ।

यस्तै उत्पादन ७२.२७ अंक, लघुवित्त ६०.४८ अंक, व्यापार ५५ अंक, विकास बैंक ४७ अंक, अन्य उपसमूह ३६ अंक र जलविद्युत समूह २७ अंकले घटेको छ ।