फागुन १२, काठमाडौँ । १हप्ताको फरक राखेर १० कक्षाको माध्यमिक शिक्षा परीक्षा (एसईई) र १२ कक्षाको अन्तिम वार्षिक परीक्षा लिने गरी राष्ट्रिय परीक्षा बोर्डले आन्तरिक तयारी शुरू गरेको छ ।

बोर्डले २०७८ सालको जेठ तेस्रो हप्ता एसईई र अन्तिम हप्ता १२ कक्षाको अन्तिम परीक्षा लिने गरी तयारी थालेको हो । बोर्डका उपाध्यक्ष प्रा.डा. चन्द्रमणि पौडेलले परीक्षाका लागि आन्तरिक तयारी भइरहेको उल्लेख गर्दै चैतभित्र औपचारिक परीक्षाको कार्यतालिकाबारे औपचारिक रूपमा निर्णय गरिने जानकारी दिए ।

हाल दुवै तहको परीक्षाका लागि बोर्डले विभिन्न चरणको काम गरिरहेको छ । बोर्डको यो तयारी कार्यान्वयन हुन सके विद्यार्थीको शैक्षिक सत्रमा २/३ महिनाको हाराहारीमा मात्र क्षति हुनेछ । विगतका वर्षमा चैतमा एसईई र वैशाखमा १२ कक्षाको परीक्षा सञ्चालन गर्ने गरिएको थियो ।

एसईईका लागि देशभरका विद्यार्थीले रजिस्ट्रेसन फाराम भर्ने म्याद फागुन ६ गते सकिएको छ । हाल जिल्ला–जिल्लामा विद्यार्थीको अभिलेखीकरण गर्ने कार्य भइरहेको जानकारी बोर्डले दिएको छ । सबै विद्यार्थीको विवरण यकिन गर्न चैतसम्म लाग्ने आकलन गरिएको छ ।

त्यसपछि मात्र आगामी वर्ष एसईई दिने विद्यार्थीको संख्या यकिन हुनेछ । यस पटक कोरोना भाइरस संक्रमणका कारण विद्यार्थीको संख्या घट्नसक्ने प्रारम्भिक आकलन गरिए पनि त्यसको निधो हुन सकेको छैन ।

सरकारले एउटा विद्यालय छोडेर अर्को विद्यालय गएको विद्यार्थीलाई लक्षित गरी यस पटक १० कक्षामा समेत स्थानान्तरणको सुविधा दिने निर्णय यसअघि नै गरिसकेको छ ।

हाल ११ र १२ कक्षामा अध्ययन गर्ने विद्यार्थीको रजिस्ट्रेसन भर्ने काम भइरहेको छ । बोर्डले फागुनभित्र रजिस्ट्रेसन फाराम भर्ने समय विद्यार्थीलाई उपलब्ध गराएको छ । फारम भरेपछि सबै खालका तयारी पूरा गरी जेठमा १२ कक्षाको समेत परीक्षा लिन सकिने आकलन बोर्डका पदाधिकारीले गरेका छन् ।

११ कक्षाको अन्तिम परीक्षा भने सम्बद्ध विद्यालयले नै सञ्चालन गर्नेछ । गत वर्ष सरकारले ११ कक्षाको परीक्षा सञ्चालन, नतिजा प्रकाशनलगायतको अधिकार सम्बद्ध विद्यालयलाई नै दिने निर्णय गरेको थियो ।

सरकारले नयाँ कुनै नीतिगत निर्णय गरेबाहेक ११ कक्षाको परीक्षा सम्बद्ध विद्यालयले नै सञ्चालन गर्ने जानकारी बोर्डका उपाध्यक्ष पौडेलले दिए । गोरखापत्र दैनिकमा खबर छ ।