२९ माघ, काठमाडौं । नेपाल कम्युनिष्ट पार्टी ९नेकपा० प्रचण्ड–माधव पक्षका नेता भीम रावलले राष्ट्रपति र प्रधानमन्त्रीलाई राज्य ठान्नु गलत भएको बताएका छन् ।

राष्ट्रपति विद्यादेवी भण्डारीको सन्दर्भमा राखेको अभिव्यक्तिलाई लिएर आफ्नो पार्टीकी नेतृ रामकुमारी झाँक्रीलाई सरकारले पक्राउ गरे लगत्तै पूर्वगृहमन्त्री समेत रहेका नेता रावलले यस्तो धारणा व्यक्त गरेका हुन् ।

राष्ट्रपति वा प्रधानमन्त्री जस्ता पदाधिकारीको असंवैधानिक र गलत कामको लोकतन्त्रमा आलोचना गर्न पाइने नेता रावलको भनाइ छ ।

‘राष्ट्रपति र प्रधानमन्त्री नै राज्य होइनन् । ती पदाधिकारीका असंवैधानिक र गलत कामको आलोचना लोकतन्त्रमा गर्न पाइन्छ’ रावलले लेखेका छन्, ‘आलोचनालाई राज्यविरुद्धको अपराध भन्नु हास्यास्पद छ ।’

नेपालमा निरंकशुता र दमनले मनपरीतन्त्र नटिक्ने तथ्य नेपालमा पुष्टि भइसकेको उनको जिकिर छ । उनले भनेका छन्, ‘यसको राष्ट्रपति र प्रधानमन्त्रीले स्मरण गरुन् ।’

‘रामकुमारीको पक्राउ निरंकुश कृत्य’

नेता भीम रावलले झाँक्रीको पक्राउलाई सरकारको निन्दनीय कृत्य भएको बताएका छन् । आफ्नो पार्टीकी नेतृ झाँक्रीलाई तुरुन्त रिहा गर्न समेत माग गरेका छन् ।

प्रधानमन्त्री केपी शर्मा ओलीले आफू सहभागी मञ्चबाट मन्त्री र साइबर अपराधीलाई अश्लील गाली गर्न लगाएको आरोपसमेत लगाएका छन् ।

पूर्वगृहमन्त्री समेत रहेका नेता रावलले ट्विटरमा लेखेका छन्, ‘आफैं रहेको मञ्चमा मन्त्रीबाट र साइबर अपराधीद्वारा अश्लील गाली गर्न लगाई स्वाद लिने प्रम ओलीले आफ्नो असंवैधानिक र स्वेच्छाचारी काम र त्यसमा हतार गरी साथ दिने राष्ट्रपतिको आलोचना गर्दा नेतृ रामकुमारी झाँक्रीलाई पक्राउ गर्नु निन्दनीय निरंकुश कृत्य हो । नेतृ झाँक्रीलाई तुरुन्त रिहा गर ।’

राष्ट्रपति विद्यादेवी भण्डारीको विषयमा दिएको अभिव्यक्तिलाई लिएर नेतृ झाँक्रीलाई बिहीबार प्रहरीले निवासबाटै पक्राउ गरेको थियो ।