काठमाडौं, २८ माघ । यस वर्षको एसइई परीक्षा सरकारले केन्द्रस्तरबाट नै सञ्चालन गर्ने निर्णय गरेको छ ।

मन्त्रिपरिषद् बैठकले केन्द्र प्रदेश सरकारसँग आवश्यक समन्वय गरी राष्ट्रिय परीक्षा बोर्डले विगतको वर्ष जस्तै एसईई सञ्चालन गर्ने, नतिजा प्रकाशन र प्रमाणीकरण गर्ने निर्णय गरिसकेको छ ।

शिक्षा विज्ञान तथा प्रविधि मन्त्रालयका अनुसार सबै जिम्मा बोर्डले पाएका कारण अब एसइई परीक्षाको मिति पनि बोर्डले नै तोक्नुपर्ने छ । यता, बोर्डका अध्यक्ष प्राध्यापक डाक्टर चन्द्रमणि पौडेलले मन्त्रिपरिषदले केन्द्रस्तरबाटै परीक्षा गराउने निर्णय गरेपनि लिखित निर्णय नआएसम्म समय नतोकिने जानकारी दिनुभयो ।

उहाँले परीक्षाको लागि फर्म भर्ने काम भने भैरहेको पनि जानकारी दिनु भयो । एसईईको परीक्षा प्रदेश स्तरबाट सञ्चालन गर्नुपर्ने व्यवस्था भए पनि यसमा राज्यले स्पष्ट कानून बनाउन सकेको छैन ।

गत वर्षको एसईई परीक्षा कोभिड–१९ का कारण सरकारले विद्यालयको आन्तरिक मूल्यांकनबाट गर्ने निर्णय गरेको थियो । तर, यस वर्षको परीक्षा भने अब बोर्डले नै लिनेछ ।