भरतपुर महानगरपालिकामा रेनु दाहाल यसपटक पनि चुनावी मैदानमा छिन् । उनलाई नेकपा एमालेका विजय सुवेदी र स्वतन्त्र उम्मेदवार जगन्नाथ पौडेलको मुख्य चुनौती देखिएको छ ।

२०७४ को स्थानीय निर्वाचनको परिणामलाई केलाउँदा रेनु दाहालले ४३ हजार १ सय २७ मत ल्याएर जित निकालेकी थिइन् । एमालेका देवी ज्ञवालीले ४२ हजार ९ सय २४ मत ल्याएका थिए । मतगणना हुँदा एउटा वडाको मतपत्र नै च्यातेपछि पुनः मतदान भएको थियो । रेनुले झीनो मतान्तरले जितेकी थिइन् । त्यतिबेला राप्रपाका मेयरका उम्मेदवारले ६ हजार ८ सय ४२ मत प्राप्त गरेका थिए ।

भरतपुरमा गत स्थानीय चुनावमा काँग्रेसले माओवादीलाई सघाएको थियो । काँग्रेसकी उपमेयरकी उम्मेदवार पार्वती शाह ठकुरीले ४७ हजार १ सय ९७ मत ल्याएकी थिइन् । रेनुको भन्दा पार्वतीको ४ हजार मत बढी थियो । यसबाट पनि काँग्रेसका मतदाताको ४ हजार मत अन्यत्र गएको तथ्यांक बुझ्न सकिन्छ ।

यसपटक जगन्नाथ पौडेलले काँग्रेस नेतृत्वको आग्रहलाई नमानेर बागी उम्मेदवारी दिएका छन् । अब उनले ल्याउने मतले रेनुको पक्षमा आउने मत प्रभावित हुन्छ । पौडेलको पक्षमा बढी मत खनिएमा रेनुलाई चुनाव निकै जित्न कठिन हुनसक्छ । कम मत खसेमा सम्भावना बढ्छ ।

एमालेले आफू हार्ने अवस्था आएमा जगन्नाथ पौडेललाई सघाउन सक्ने चर्चा पनि नचलेको होइन । राजनीतिमा चल्ने रणनीतिक दाउपेचमा असम्भव भन्ने हुँदैन । तर, पाँच वर्ष भरतपुर महानगरपालिकाको विकासमा काम गरेको, प्रचण्डको छोरी समेत भएकाले रेनु हेभिवेट उम्मेदवार हुन् । यसकारण उनी सजिलै जित्ने दाबी गरिरहेकी छिन् ।

नारायणी नदीमा पाँच वर्षमा धेरै पानी बगिसकेको छ । विगतको चुनावी परिणाम समिक्षाको आधार हुनसक्ला । तर, चितवनमा गत संसदीय चुनावमा काँग्रेस कुनैपनि क्षेत्रमा जित्न सकेन । अर्कोतर्फ महानगरपालिकामा नेतृत्व पनि काँग्रेसको हातमा रहेन । यसले काँग्रेसको संगठनमा असर परिसकेको छ । त्यसमाथि जगन्नाथको उम्मेदवारीले नयाँ घटना विकास भएको छ ।

एमालेको फुट, काँग्रेसमा पनि आन्तरिक मतभेद बढ्नु र पाँच वर्ष भरतपुरको नेतृत्वमा रहनुले रेनु मतदाता माझ भिजेको उम्मेदवारमा पर्छिन् । तर, चुनावमा रोचक घटना विकास भएकाले तीन उम्मेदवारहरुबीच कडा प्रतिष्पर्धा हुने देखिदैछ ।