अस्ट्रेलिया पढ्न जाने नेपालीसहित अन्तर्राष्ट्रिय विद्यार्थीहरु र ‘वर्किङ होलिडे’मा जानेहरुका लागि अस्ट्रेलिया सरकारले भिसा शुल्क छुट गरिदिएको छ । यो नयाँ नियम आज बुधबारबाटै लागू हुँदैछ । अस्ट्रेलियाको आर्थिक स्रोतको ठूलो हिस्सा ओगट्ने अन्तर्राष्ट्रिय विद्यार्थीहरुलाई आकर्षित गर्न र देशमा पछिल्लो समय भइरहेको कामदारको अभाव पूर्ति गर्नको लागि संघीय सरकारले यस्तो निर्णय गरेको बताइएको छ ।

प्रधानमन्त्री स्कट मोरिसनले बुधबार बिहान गरेको यो घोषणा पहिल्यै अस्ट्रेलियाको भिसा पाउन योग्य भएर अस्ट्रेलिया प्रवेश गर्न बाँकी रहेका करिब १ लाख ५० हजार अन्तर्राष्ट्रिय विद्यार्थी र २३ हजार ५ सय ‘वर्किङ होलिडे’मा जानेहरुका लागि लक्षित गरिएको सिड्नी मर्निङ हेराल्डले आफ्नो एक रिपोर्टमा जनाएको छ । यसअघि अस्ट्रेलिया प्रवेश गर्नको लागि विद्यार्थीहरुले ६३० अस्ट्रेलियन डलर (५४ हजार नेपाली रुपैयाँ) र ‘वर्किङ होलिडे’मा जानेहरुले ४९५ अस्ट्रेलियन डलर (४३ हजार नेपाली रुपैयाँ) भिसा शुल्क तिर्नुपर्ने नियम थियो ।

यो छुट विद्यार्थीहरुको लागि आज बुधबारदेखि सुरु भएर आगामी ८ हप्तासम्म लागू रहनेछ । ‘वकिङ होलिडे’मा जानेहरुले भने आजदेखि आगामी १२ हप्तासम्म यो छुट पाउनेछन् । प्रधानमन्त्री मोरिसनले यो अफर विद्यार्थीहरुलाई अस्ट्रेलियालाई नै रोजेर त्यहाँ पढ्न गएवापत ‘धन्यवाद’को रुपमा ल्याइएको बताए । कोभिड–१९ आइसोलेसन नियमका कारण अस्ट्रेलियामा उद्योग र व्यवसाय धराशायी भएको छ र यहाँ सप्लाइ चेनमा ठूलो समस्या आएको छ ।