ग्रनाडामाथि शानदार जीत हासिल गर्दै रियल म्याड्रिड पुनः स्पेनिस ला लिगाको शीर्ष स्थानमा उक्लिएको छ । आइतबार राति भएको खेलमा रियल ४-१ गोलले विजयी भएको हो । पहिलो हाफमा मार्को असेन्सिया र नाचोले रियललाई अग्रता दिलाए पनि ग्रनाडाका लुइस सुवारेजले हाफ टाइमअघि एक गोल फर्काएका थिए ।

दोस्रो हाफमा भिनिसियस जुनियरले गोल गर्दै रियललाई पुनः दुई गोलको अग्रता दिलाए । यो सिजन भिनिसियसले सबै प्रतियोगितामा १५ खेलमा १० गोल गरेका छन् । त्यसपछि मोन्चुले रातो कार्ड खाएपछि ग्रनाडा १० खेलाडीमा सीमित बन्यो ।

खेलको ७६ औँ मिनेटमा फर्लान मेन्डीले अर्को गोल थप्दै रियललाई सहज जीत दिलाए । जीतसँगै रियल सोसिडाड र सेभियालाई उछिन्दै रियल लिगको शीर्ष स्थानमा उक्लिएको छ । १३ खेलपछि रियलको ३० अंक रहेको छ । ग्रनाडा भने रेलिगेसजन जोनमा पुगेको छ । आइतबार नै भएका अन्य खेलमा सोसिडाड र भ्यालेन्सियाले गोलरहित बराबरी खेलेका थिए ।