महाकाली नदीको टापुमा फसेका ५ जनाको १५ घण्टापछि उद्धार गरिएको छ । कञ्चनपुरको भीमदत्त नगरपालिका–९ मुसेट्टिमा फसेका ५ जनाको नेपाली सेनाको हेलिकप्टरमार्फत उद्धार गरिएको हो ।

सुर्खेतबाट आएको सेनाको पश्चिम कमाण्ड हेलिकप्टरले उद्दार गरेको हो । प्रतिकुल मौसमका वाबजुद सेनाको हेलिकप्टरले उद्धार गरेको जनाइएको छ ।

उद्धार गरिएकाहरुमा ३६ वर्षीय पुष्कर नायक, ३२ वर्षीय शान्ति नायक, १० वर्षीय अजय नायक, ४ वर्षीय सुरज नायक र ५० वर्षीया गौरी खड्का छन् । उनीहरु महाकालीको भंगालोमा फसेका थिए । उनीहरू १५ घण्टादेखि रूखमा चढेर बसेका थिए ।

उद्धारका लागि दिउँसो ४ बजे नै हेलिकप्टर त्यस क्षेत्रमा पुगेको थियो । तर, भिजिबिलिटी कम भएपछि उद्धारमा कठिनाइ भएको थियो । उद्धारका लागि सेनाको हेलिकप्टर डडेल्धुराको जोगबुढा रुट हुँदै पहाडको खोँचबाट मुसेट्टी पु¥याउन खोजिएको थियो । तर, भिजिबिलिटि कम भएपछि धनगढी फिर्ता भएको थियो ।

लामो समयको प्रयासपछि सेना उद्धार गर्न सफल भएको हो । कुखुरा फार्ममा कुरुवा बस्न गएका मुसेट्टिका एकै परिवारका ५ जना सोमबार रातिदेखि टापुमा फसेका थिए । आज बिहान मात्र उनीहरू फसेकोबारे जानकारी आएको थियो । त्यसपछि उनीहरूको उद्धारका लागि जनप्रतिनिधि र स्थानीय प्रशासन लागेको थियो । तर, नदीको बहाव एकदमै बढी भएका कारण डुंगाबाट उद्धार गर्न समस्या भएको थियो । त्यसपछि सेनाको हेलिकप्टर मगाइएको हो ।