असोज १५ देखि १७ गतेसम्म काठमाडौंमा हुने विधान महाधिवेशनमा पेश गर्ने राजनीतिक प्रतिवेदन पारित गर्दै नेकपा एमालेको केन्द्रीय कमिटी बैठक सम्पन्न भएको छ ।

ललितपुरको च्यासलस्थित तुल्सीलाल स्मृति प्रतिष्ठानको कार्यालयमा शुक्रवार शुरू भई आइतवार सम्पन्न बैठकले तीनवटा राजनीतिक प्रतिवेदन पारित गरेको हो ।

अध्यक्ष केपी शर्मा ओलीले पेश गरेको राजनीतिक प्रतिवेदन, महासचिव ईश्वर पोखरेलले पेश गरेको संगठनात्मक प्रतिवेदन र उपमहासचिव विष्णु पौडेलले पेश गरेको विधान संशोधन प्रस्ताव सुझावसहित पारित भएको हो । पहिलो पटक हुन लागेको विधान महाधिवेशनमा विधान संशोधन मुख्य चासोको विषय रहेको छ ।

पदाधिकारीको अहिलेको संरचनामा हेरफेर गर्दै उपाध्यक्षको संख्या घटाउन र सचिवको संख्या बढाउन विधान संशोधन मस्यौदामा प्रस्ताव गरिएको छ ।

केन्द्रीय कमिटी बैठकबाट आएका सुझाव सम्बन्धमा छलफल गर्न एमालेले सोमवारका लागि स्थायी कमिटीको बैठक बोलाएको छ । सोमवार बिहान ११ बजेका लागि स्थायी कमिटी बैठक तय भएको पार्टी केन्द्रीय कार्यालयका सचिव शेरबहादुर तामाङले जानकारी दिए ।