लुम्बिनी प्रदेश सरकारले प्रदेशको स्थायी राजधानी देउखुरीमा मुख्यमन्त्रीको सम्पर्क कार्यालय स्थापना गर्ने निर्णय गरेको छ । राप्ती गाउँपालिका–२, लालमटियामा सम्पर्क कार्यालय राख्ने निर्णय गरिएको हो ।

शुक्रबार बसेको लुम्बिनी प्रदेशको मन्त्रिपरिषद् बैठकले सहरी विकास मन्त्रालयले मुख्यमन्त्री कार्यालयको सम्पर्क कार्यालय रहने गरी भौतिक पूर्वाधारको व्यवस्थान गर्ने निर्णय गरिएको छ ।

संविधान दिवस–२०७८ को अवसरमा प्रदेशभित्र विभिन्न क्षेत्रमा योगदान गर्ने ५७ जना विशिष्ट व्यक्तिहरूलाई प्रदेश पदकद्वारा सम्मान गर्ने निर्णय पनि गरिएको छ ।

यस्तै, साबिकको मुख्यमन्त्री ग्रामीण विकास तथा रोजगारको कार्यक्रमको ठाउँमा मुख्यमन्त्री शैक्षिक सुधार कार्यक्रम लागु गर्ने, प्रदेश सरकारको कार्यविभाजन नियमावलीको अनुसूचीममा रहेर हेरफेर भएअनुसारको साबिकको मन्त्रालयहरूले कार्यजिम्मेवारी हेरफेर भएबमोजिम सम्बन्धित मन्त्रालहरूलाई अभिलेख र सम्पत्ति दायित्व र जनशक्ति समेत हस्तान्तरण गर्ने निर्णय गरिएको लुम्बिनी सरकारका प्रवक्ता कृष्णध्वज खड्काले जानकारी दिए ।

बैठकले मुख्यमन्त्रीको जनसम्पर्क सल्लाहकारमा रोल्पाका रमेशबहादुर वली क्षेत्रीलाई नियुक्त गर्ने निर्णय पनि गरेको छ ।

झिमरुक गाउँपालिकाको केन्द्र भ्यागुतेको सट्टा मच्छि कायम गर्ने, त्रिवेणी गाउँपालिकाको वडा, रोल्पा नगरपालिकाको वडा थपघट तथा समायोजन र बुटवल उपमहानगरपालिकाको वडा थपघट तथा समायोजन गर्ने निर्णयसमेत बैठकले गरेको प्रवक्ता खड्काले जानकारी दिए ।