युरोपियन च्याम्पियन्स लिगको समूह ‘एच’ को खेलमा इंग्लिस क्लब चेल्सी र इटालियन क्लब युभेन्ट्स विजयी भएका छन्।

चेल्सीले रसियन क्लब जेनिथ सेन्ट पिटर्सवर्गलाई १-० गोलले पराजित गर्‍यो।

चेल्सीको जितमा रोमेलु लुकाकुले गरेको गोल निर्णायक बन्यो। उनले खेलको ६९ मिनेटमा गोल गरेका थिए।

यो समूहको अर्को खेलमा इटालियन क्लब युभेन्ट्स विजयी भएको छ। युभेन्ट्सले स्विडेनको माल्मो एफएफ ३-० गोलले पराजित गर्‍यो।

युभेन्ट्सको जितमा लोबो सिल्भाले २३ मिनेटमा पहिलो गोल गरे। पहिलो हाफको अन्तिम मिनेटमा पाब्लो डिबालाले पेनाल्टीमार्फत गोल गर्दै युभेन्ट्सको अग्रता दोब्बर पारे।

पहिलो हाफकै इन्जुरी टाइममा युभेन्ट्सले तेस्रो गोल गर्‍यो। उसका लागि मोराटाले गोल गरेका थिए।

पहिलो हाफमा ३ गोल गरे पनि युभेन्ट्सलाई दोस्रो हाफमा माल्मोले रोक्न सफल भयो।

सन् १९९६ देखि च्याम्पियन्स लिगको उपाधि जित्न नसकेको युभेन्ट्सले अब २९ सेप्टेम्बरमा साविक विजेता चेल्सीसँग घरेलु मैदानमा प्रतिस्पर्धा गर्नेछ।