प्रमुख प्रतिपक्ष दल नेकपा (एमाले) का महासचिव ईश्वर पाखरेलले सत्तारूढ गठबन्धनलाई ‘टालाटुली’को संज्ञा दिएका छन् । सोमबार काठमाडौंमा आयोजित सञ्चारकर्मीसँगको अन्तरक्रिया कार्यक्रममा बोल्दै महासचिव पोखरेलले सत्तारूढ गठबन्धन धेरै दिन टिक्न नसक्ने दाबीसमेत गरे ।

“टालाटुली बाटुली के जाति भन्ने कुरा छ नि, त्यो हेर्दै जानु छ । यो गठबन्धन कसरी रहन्छ, कति दिन रहन्छ ? कसरी गर्छ, हेर्दै जानुछ । हामी नेसनल पोलिटिक्सको सही पोलमा उभिएर मुलुकलाई सही दिशा दिने हिसाबले अगाडि जान्छौँ,” उनले भने ।

पोखरलले माओवादी केन्द्रका अध्यक्ष पुष्पकमल दाहाल र एमालेभित्रको गुटबन्दीको कारण एमालेमा विभाजन आएको पनि बताए ।

उनले पार्टीको आगामी महाधिवेशनमा आफू पनि अध्यक्ष पदका लागि योग्य उम्मेदवार भएको बताए । सञ्चारकर्मीहरूले राखेका जिज्ञासाको जवाफ दिने क्रममा महासचिव पोखरेलले इतिहास, निष्ठा, निरन्तरता र क्षमता सबै हिसाले आफू कुनै पनि जिम्मेवारी लिन सक्षम रहेको बताए ।

नेकपा एमालेको आगामी महाधिवेशन २०७९ साल वैशाख १० गतेभित्र सम्पन्न गरिसक्नुपर्नेछ । महासचिव पोखरेलले त्यसैको तयारीका लागि पार्टीले आगामी असोज पहिलो हप्ता विधान महाधिवेशनको आयोजना गरेको जानकारी दिए ।