फोहोर सिसडोल पु¥याउन नपाएको भदौ १० देखि मात्रै होइन । मनसुन शुरू भएदेखि नै हिलोका कारणले सडकमा समस्या छ र अवरुद्ध भइरहन्छ । यसैकारण दुई साताभन्दा लामो समयदेखि फोहोर उठेको छैन ।
आखिर कहिलेसम्म यस्तो !
सडकको समस्याले अझै केही दिन फोहोर सिसडोलमा पुग्न नसक्ने बताउँछन् महानगरका वातावरण विभाग प्रमुख हरि श्रेष्ठ ।
स्थलगत अनुगमनका लागि सिसडोल पुगेका श्रेष्ठले सडक मर्मत गरेर ठिक पार्नुबाहेक अर्को कुनै विकल्प नरहेको उनको भनाइ छ ।
उनका अनुसार घाम लागेपछि मात्रै बाटो बनाउने काम शुरू हुन्छ । तत्कालै काठमाडौँको सबै फोहोर उठ्न सम्भव छैन । अहिले घरमै फोहोर व्यवस्थापन गर्न उनको आग्रह छ ।
श्रेष्ठका अनुसार काठमाडौँको फोहोर उठ्दै नउठेको भने होइन । सामान्य अवस्थामा दिनमा दैनिक डेढ सयदेखि दुई सय गाडी फोहोर उठ्थ्यो, अहिले ५० गाडीमा सीमित छ । करिब दुई सय मिटर उकालोमा फोहोरका गाडी स्काभेटरले धकेल्नु पर्छ ।
कुरा बन्चरे डाँडाँको
उपत्यकाको फोहोरमैला व्यवस्थापनका लागि दीर्घकालीन समाधान भनेर सिसडोलबाट दुई किलोमिटर टाढा बन्चरे डाँडामा अर्को ल्यान्डफिल साइट निर्माणाधीन छ । दुई सय मिटर बाटो अझै कच्ची छ ।
बन्चरे डाँडामा ल्यान्डफिल साइटको काम एक वर्षमा सक्ने गरी २०७६ वैशाख तेस्रो साता ‘लुम्बिनी कोशी एन्ड न्यौपाने जेभी’ सँग शहरी विकास मन्त्रालयले ठेक्का सम्झौता गरेको थियो । यसको लागत भ्याटबाहेक ३४ करोड ६८ लाख रुपैयाँ छ ।
दुई वर्षभन्दा बढी भयो तर काम सकिएको छैन । कुल १ हजार ७ सय ९२ रोपनी क्षेत्रफल ओगटेको बन्चरेडाँडा ल्यान्डफिल साइट पहाडको फेदमा छ । यहाँ २५ वर्ष लागि फोहोर बिर्सजन गर्न सकिने अनुमान छ ।
आइबार करिब १० जना श्रमिकहरू काम गरिरहेका थिए । उनीहरूले काम अन्तिम चरणमा रहेको बताए ।
बन्चरेडाँडा ल्यान्डफिल साइटमा लिचड ट्यांक तयार भएको छैन । पानी पम्पिङ गर्ने ट्यांकी बनिरहेको छ ।
