रुपन्देहीको तिनाउ दानव कोरिडोरको बुधवार शिलान्यास गरिएको छ । उक्त कोरिडोरको सरकारका अर्थमन्त्री एवं सत्तारुढ दल नेपाल कम्युनिष्ट पार्टि (नेकपा) का महासचिव विष्णु पौडेलले शिलान्यास गर्नुभएको हो ।
आफ्नो चुनावी घोषणापत्रमा समेत यो परियोजनालाई महत्वका साथ समावेश गर्नुभएका पौडेलले यो आयोजनालाई आफ्नो ड्रिम प्रोजेक्टको रुपमा अगाडी सारिएको बताउनुभयो ।
कोरिडोरको शिलान्यास गर्दै मन्त्री पौडेलले रुपन्देहीमा कुनैपनि विकास आयोजना अधुरा रहन नदिने र आर्थिक, पर्यटन, सांस्कृतिक र वाणिज्यको केन्द्र बनाउने गरि योजना अगाडी बढाईने बताउनुभयो ।
मन्त्री पौडेलले अहिले संचालन भईरहेका र अगाडी सारिएका आयोजनाहरु सम्पन्न हुंदा रुपन्देही विकासमा सबैभन्दा अब्बल बन्ने र रुपन्देहीको महत्व अझै बढ्ने उल्लेख गर्दै निर्वाचनको बेला जनतासंग गरिएका प्रतिबद्धता र घोषणापत्र एकएक गरि कार्यान्वयन गर्दै अघि बढ्ने बताउनुभयो ।
अर्थमन्त्री पौडेलले अहिलेको सरकारले एकपछि अर्को राष्ट्र र जनपक्षिय निर्णय गर्दै नतिजा र परिणाम मुखीकाम गरेर देखाउने बताउनुभयो ।
बुटवल बजारको बिच भएर बग्ने तिनाउ र दानव नदीको दुवैतर्फको किनारै किनार बन्ने करिडोरको निर्माणपछि भारतिय सिमासंग जोडिएको रुपन्देहीको मर्चवारलाई बुटवलसंग जोडिन सहज हुने विश्वास गरिएको छ ।
तिनाउ नदीमा ३५ किलोमिटर र दानव नदीमा १५ किलोमिटर गरि दुवैतर्फ २ लेनको सडक निर्माण हुने छ । त्यसको लागि पहिलो चरणमा तिनाउ नदीको साढे ८ र दानव नदीको साढे ३ किलोमिटरका लागि ठेक्का सम्झौता भईसकेको छ ।
जसअनुसार तिनाउ कोरिडोरमा ५२ करोड ४६ लाख र दानव कोरिडोरमा १९ करोड ४२ लाख रुपैयामा किरांतेश्वर मैनाचुली अविसा जेवी र लामा बानियां जेवीसंग गत असोजमा ठेक्का सम्झौता भएको हो ।
किरांतेश्वर मैनाचुली अविसा जेवीले तिनाउ तर्फको र लामा बानियां जेवीले दानवतर्फको सडक निर्माण गर्ने छन् । ठेक्का सम्झौता अनुसार तिनाउ तर्फको ३६ महिना र दानव तर्फको २७ महिनामा सडक निर्माण सक्नुपर्ने छ ।
पहिलो चरणमा तिनाउतर्फको बुटवल नयां बसपार्क पछाडिदेखि तिलोत्तमाको मगरघाट सम्म र दानवतर्फ बेलवास झोलुंगे पुलदेखि नयांगाउं पुलसम्म कोरिडोर निर्माण हुने सडक विभागले जनाएको छ ।
दुवैतर्फ गरि ५० किलोमिटर सडक निर्माणका लागि ४ अर्ब १३ करोड रुपैया लाग्ने विभागले गरेको अध्ययन प्रतिवेदनले देखाएको छ । कोरिडोर निर्माणपछि अहिले अतिक्रमण हुंदै आएको तिनाउ नदिको उकास क्षेत्र जोगिने र नदिको बहाव क्षेत्र सुरक्षित हुने विश्वास गरिएको छ ।
हाल तिनाउको बहाव क्षेत्र समेत अतिक्रमण गरि बस्ती बसाईएको छ । सडक निर्माणको क्रममा बहाव क्षेत्र छाडेर नदीको जगदेखि नै पर्खाल लगाइने भएकोले नदि कटान तथा अतिक्रमणको समस्या हट्ने बुटवल उपमहानगरपालिकाले जनाएको छ ।
नदितर्फको ३ मिटर क्षेत्रमा हरियाली क्षेत्र बनाइने छ भने त्यसपछि मात्र १४ मिटरको दुईलेन सडक सडक हुने छ । त्यस्तै बस्तीतर्फको सडक छेउमा फुटपाथ निर्माण गरिने छ ।
हाल नदिको किनार सम्मै घरटहरा बनाई बस्ती बसेकोले सडक निर्माणको क्रममा घरटहरा हटाउनुपर्ने डिभिजन सडक कार्यालय बुटवलले जनाएको छ । कोरिडोरका लागि ७ सय ५ वटा घरटहरा हटाउनुपर्ने र त्यसको लागि बुटवल उपमहानगरपालिका तथा तिलोत्तमा र सैनामैना नगरपालिकाले लिखित प्रतिवद्धता समेत गरिसकेको कार्यालयले जनाएको छ ।
यी दुवै आयोजनाले तिनाउ नदिको सुरक्षा र सौन्दर्य बढाउने मात्र होईन रुपन्देहीको आर्थिक तथा पर्यटन विकासमा समेत महत्वपूर्ण भूमिका निर्वाह गर्ने विश्वास गरिएको छ ।
तिनाउको संरक्षण तथा पर्यापर्यटनको विकासका लागि भन्दै थालिएको कोरिडोरले गौतमबुद्ध अन्तर्राष्ट्रिय विमानस्थल, लुम्बिनी, सैनामैना तथा बेथरी हुँदै भारतसम्म जोड्ने छ ।
यसअघि अर्थमन्त्री पौडेलले सैनामैनाको वडा नं १ रानिवगियामा रहेको सैनामैना पर्रोहा परमेश्वर माध्यमिक विद्यालय र वडा नं. ४ मा रहेको पर्रोहा माध्यमिक विद्यालय भवनको उद्घाटन गर्नुभएको थियो ।
तिलोत्तमा स्थित गिर्वाण सरस्वती स्कुलको भवन उद्घाटन तथा छात्राबास शिलान्यास गर्नुभएको छ । विहिबार पनि अर्थमन्त्री पौडेलले तिलोत्तमामा १५ शैयाको अस्पताल शिलान्यास, झुम्सा खानेपानी आयोजना शिलान्यास तथा अनलाईनबाट कर प्रणालीको शुभारम्भ लगायतका कार्यक्रममा सहभागि हुने कार्यक्रम तय भएका छन् ।