रुपन्देही उद्योग संघको आयोजनामा ‘संमृद्ध नेपाल निर्माणको आधारः स्वदेशी उद्यमशीलताको विस्तार’ भन्ने मूल नाराका साथ विहीवारदेखि बुटवलमा १५ औं राष्ट्रिय औद्योगिक प्रदर्शनी कृषि, प्रविधि तथा पर्यटन महोत्सव–२०७९ सुरु भएको छ । प्रदर्शनीको पूर्व सन्ध्यामा बुधवार औद्योगिक जनचेतना ¥याली प्रदर्शन गरिएको छ । यो औद्योगिक ¥यालीले औद्योगिक जागरण सिर्जना गर्न महत्वपूर्ण सहयोग पुग्ने ठानिएको छ । स्वदेशी उत्पादनको प्रदर्शन र बजारीकरण गर्ने मुख्य उद्देश्यका सुरु भएको प्रदर्शनी आर्थिक विकासमा कोसेढुंगा हुने विश्वास गरिएको छ । प्रदर्शनीको ७ लाख दर्शकले अवलोकन गर्ने र २५ करोडको आर्थिक कारोवार हुने लक्ष्यले नै प्रदर्शनीको सफलता झल्किएको छ । अर्कोतर्फ प्रदर्शनीमा औद्योगिक प्रविधि, उद्योग प्रविधि, रेष्टुरेन्ट, कृषि, हस्तकला, फलोरीकल्चर, गार्मेन्ट, बेकरी तथा कन्फेक्सनरी, छालाजुत्ता, खाद्यान्न, आइटी लगायतका गरी ४ सय ५० स्टलले उद्योग र उपभोक्तावीचको सम्वन्ध अझै नजिक ल्याउन सहयोग पुग्ने आधार तयार भएको छ । त्यसैगरी प्रदर्शनीमा प्रविधिबारे जानकारी दिने, उद्योगी र उपभोक्ताहरूको सोझो सम्पर्कको स्थापना गर्ने, उत्पादित बस्तुहरूको बजार प्रवद्र्धन र गुणात्मक प्रतिस्पर्धाको विकास गर्ने, उद्योगीहरूका बीचमा समस्या, अवसर र चुनौतीबारे अन्तरक्रिया गर्ने, सूचना र प्रविधिको विकास, विस्तार र आदान–प्रदान गर्ने, पर्यटन क्षेत्रको विकास, सान्दर्भिक गोष्ठी, अन्तरक्रिया र कार्यशालाको आयोजना गर्ने आयोजकको योजनाले यो प्रदर्शनी सफल भैसकेको छ भन्दा अत्युक्ति हुँदैन ।

बुटवलमा हुने प्रदर्शनी, मेला र महोत्सवले निश्चित रुपमा स्थानीय गतिविधि बढाउन सहयोग पुग्छ । स्थानीय उत्पादन प्रवद्र्धन गर्न टेवा पुग्छ भने त्यसका कारण औद्योगिक एवं व्यापारिक गतिविधि बढाउन सहयोग पुग्छ । मेला र महोत्सवको रौनकले निश्चित रुपमा नेपालमा औद्योगिक एवं व्यापारिक चहलपहलमा बृद्धि गर्न थप सहयोग पुग्छ भन्ने मान्न सकिन्छ । मुलुकमा आर्थिक संकटको यो घडीमा समेत प्रदर्शनी, मेला र महोत्सव आयोजना हुनु राम्रो संकेत हो । मेला र महोत्सवले त्यस क्षेत्रको चहलपहलमा बृद्धिमात्र भएको छैन, स्थानीय गतिविधि बृद्धि गरि राष्ट्रिय उत्पादनमा सहयोग पुगेको छ भन्ने ठान्न सकिन्छ । वास्तवमा देश संकटमा हुँदा पनि आर्थिक गतिविधि बढ्ने अवस्थाले आशाको संचार गरेको छ । यो भनेको जनता चलायमान छन र देशले थोरै फडको मारेपनि यहाँको आर्थिक सूचकाँक राम्रो विन्दुमा पुग्नसक्छ भन्ने हो ।

पछिल्लोसमय रुपन्देहीमा भैसकेका मेला र महोत्सवले यस क्षेत्रको उद्योग र व्यापारको क्षेत्र प्रवद्र्धनमा ठूलो टेवा पुगेको छ । भैरहवामा सम्पन्न लुम्विनी महोत्सवले नेपालका उद्योगले उत्पादन गरेका उत्पादन उपभोक्ताले चिन्न र किन्ने मौका पनि पाए । नेपालकै उत्पादनको विषयमा उपभोक्तालाई जानकारी नभएको अवस्थामा महोत्सवले त्यो अवसर जुराएको छ । त्यसैगरी मणिग्राममा सम्पन्न तिलोत्तमा मेलाले पनि यस क्षेत्रको औद्योगिक जागरणमा महत्वपूर्ण सहयोग पुगेको हो । त्यसै त अहिले राष्ट्रिय अर्थतन्त्र सुधारोन्मुख भन्दा पनि कमजोर अवस्थामा छ । यही अवस्था रहे नेपालले विकासमा अघि बढ्न धेरै वर्ष कुर्नुपर्ने हुनसक्छ । मुलुकको आर्थिक अवस्था कमजोर रहँदा पनि यहाँ भैरहेको गतिविधिले भने केही आशाातीत संभावनालाई उजागर गरिरहेका छन । प्रदर्शनी, मेला र महोत्सवको चहलपहलले देशलाई आर्थिक सम्मृद्धितर्फ उन्मुख गराउन ठूलो मद्दत गर्दछ । यस प्रकारका प्रदर्शनी र महोत्सवलाई आगामी दिनमा पनि प्रवद्र्धन गर्नु आवश्यक छ । रुपन्देही उद्योग संघले गरेको प्रयास सराहनीय छ । आगामी दिनमा पनि यस्तै प्रदर्शनी, मेला र महोत्सवले आर्थिक गतिविधि बढाउन ठूलो सहयोग गर्ने हुँदा यस प्रकारका राम्रा र असल कामले निरन्तरता पाउनुपर्दछ ।